جريدة الوطن العربي سياسية – اجتماعية – اقتصادية – فنية- رياضية- مستقلة
لا تحبيني عسكري وحياتك معي بتتمرمري
شو جابرك معي تتعثري ولرجعتي تتنطري
لا تنطريني ع الوعد. برقيتي ما وصلت بعد
للألف عدي بعد لا تتكحلي وتتغندري
لا تحبيني عسكري
شو عاجبتك دقني حلي. روحي لبعيد والعبي
بسمع انا حبي دبي ماني رومنسي وشاعري
من كتر نوبات الحرس. طبع الملل فيي انغرس
فارس أنا من دون فرس مابخطفك لاتنطري
لا تحبيني عسكري
تيكون في عندك علم اجازتي متل الحلم
الليلة في عندي فيلم. مجبورة انك تحضري
الاكل عندي كله بوزن حتى طلعتي بدها إذن
حياتي كلها بهدلي والراتب ما بيكفي الي
لا تحبيني عسكري
عسكري وما الي وزن حياتي كله ما الها ثمن
يا بنت فكري في الزمن مربوط أنا باوامري
حبك الي كلو قهر تسريحي باقيلو دهر
مافيني أمنلك مهر. بيرضى ابوكي المفتري
لا تحبيني عسكري
وقت اللي الله بيفرجا. بكون تسريحي اجا
ماعاد في مني رجا. ختيار وعضمو مهتري
ماني معفي ولا وحيد. اخرتي عاهة او شهيد
بكرى عمري المديد. ريتك عضامي تقبري
لا تحبيني عسكري
حاجتنا حكي وثرثرة. قصتنا كلها مسخرة
يا عبلة ماني عنترة. راح الزمان العنترى
ضحيت بعمري للوطن راحت حياتي بلا ثمن
وصلوني لارذل زمن راح ماضيي وحاضري
لا تحبيني عسكري
عايش حياه كله محن مبيوع ومقبوض الثمن
الله يخون الزمن عالكرسي النذل والسرسري
تعبت من كثر الصبر ووصلت أنا لارذل عمر
بيني وما بين القبر الا الايام الباقيي
لا تحبيني عسكري
كلمات والحان شاعر
الاحساس والحب
يوسف نواحعه
فلسطين
